Бүгін "Һибатулла Тарази" мешітінде ҚМДБ "Халал даму" ЖШС-ның технолог маманы Аблайхан Ғабитұлының қатысуымен "Халал - шариғат талабы" атты семинар өтті. Іс-шара барысында ҚМДБ-ның Жамбыл облысындағы Әйел-қыздар секторының жетекшісі Жазира Иманалиева сөз сөйлеп, халал ұғымы, оның талаптары, адам өміріндегі маңызы жайында тілге тиек етті.   

Отбасы үшін ас даярлайтын да, азық-түлік таңдайтын да, балардың тамағына жауапты да әйел адамдары болғандықтан бұл дәріс нәзік жандылар үшін аса қажетті. Әйелдер жамағаты адал ас жайында жиналып қалған сауалдарына да осы кездесуде жауап тапты.

"Халал Дамуға" жауапты маман тамақ қоспаларын жіліктеп түсіндіріп, рұқсат етілген, рұқсат етілмеген және күмәнді өнімдерді қалай анықтауға болатындығымен де бөлісті.

Адал ас ішудің рухқа, денсаулыққа пайдасы жайлы ұстаздардан естіп жүрген әйелдер енді сол ас қайтсе адал болмақ, тағамдағы пайдалы, зиянды қоспалар қайсысы деген тақырыптарда дәріс тыңдап, өмірлік қажетті білім алды. 

Қатысушылар үшін арнайы слад көрсетіліп, қоспалар жайы бүгей-шегейлі түсіндірілді. Астың адал болмағы біздің рухани жай-күйімізге әсер етеді. Ол - дәлелденген дүние. Ендеше, сіз де халал сертификаты бар тағамдарды біле жүріңіз.

Ақерке БЕКҚҰЛОВА,

"Һибатулла Тарази" мешітінің баспасөз қызметі.