Түркияда электр энергиясы өшіп, 81 провинцияның 44-і жарықсыз қалды. Түркия премьер-министрі Ахмет Давутоғлудың айтуынша, жарықтың өшуіне лаңкестік акт себеп болуы мүмкін.

Электр энергиясы Түркияның ең үлкен қалалары – Анкара мен Стамбұлда да өшкен. Алдын-ала тараған деректерге сүйенсек, Түркияның орталық электр таратушы компаниясында апат болған. Қазір Стамбұлда электр тогы болмағандықтан, метрополитен жұмысы жартылай тоқтатылған. Сонымен қатар, трамвайлар мен бағдаршамдар жұмыс істемей тұр.

Түркия Энергетика министрі Танер Йылдыздың айтуынша, соңғы 15 жыл ішінде ел тұрғындары бұлай жарықсыз қалып көрмеген. Қазір қордағы электр энергиясы таусылуға шақ тұр.

Айта кету керек, биылғы жылдың 27 наурызында Нидерланды астанасы мен Амстердам маңындағы миллионға тарта үй, кеңселер мен ауруханалар электр жарығынсыз қалған.

hibatulla.kz