Алматыда Қазақстан мұсылмандары діни басқармасы төрағасының орынбасары, наиб мүфти Серікбай қажы Ораз «Исламтану және Араб филологиясы мәселелері» жөнінде XII Халықаралық ғылыми-тәжірибелік конференцияға қатысты.

«Нұр-Мүбарак» Египет ислам мәдениеті университетінің ұйымдастыруымен жыл сайын өтетін конференцияға исламтанушы, шығыстанушы, тарихшы ғалымдар қатысып, бүгінгі ислам діні төңірегіндегі өзекті мәселелерді талқылады.

Конференцияда ислам және қазіргі заман, ислам ілімдері, дін және дәстүр төңірегіндегі өзекті мәселелер сөз болды.

Жиында сөз алған наиб мүфти Серікбай қажы Ораз Діни басқарма 2015 жылды – «Әбу Ханифа» жылы деп жариялағанын, Университет жанынан ашылған «Әбу Ханифа» атындағы ғылыми-зерттеу орталығы осы жыл аясында жүзеге асыратын бірқатар игі іс-шараларды атап өтіп: «Аллаға шүкір, қазір қадамымыз – нық, бағытымыз – белгілі, діни саладағы жолымыз – айқын, тәжірибеміз мол. Жат ағымдарға төтеп берер күшіміз бен біліктілігіміз де жеткілікті. Медреселерде болашақ имамдарды даярлап жатырмыз. Дініміздің жанашыры Елбасының қамқорлығымен ашылған «Нұр Мүбарак» университеті де Орта Азияда жетекші діни оқу орнына айналып келеді. Алматыдағы Имамдардың білімін жетілдіру Ислам институты жұмыс істейді»,-деді. 

muftyat.kz