Египеттің бас прокуратурасы елдің бұрынғы президенті Мұхаммед Мүрсиге өлім жазасын беруді сұрап отыр. Сонымен қатар, "Мұсылман бауырлар" қозғалысының 35 мүшесіне де жазаның ең жоғары түрін қолдану керек дейді олар. 

Сот отырысы кезінде сөз алған прокурор Мүрси мен оның жақтастарын тыңшылықпен айналысты деп айыптады. Оның айтуынша, айыпталып отырған азаматтар шетелге мемлекеттің құпия құжаттарын өткізген. Сонымен қатар, олар палестиндік "ХАМАС" тобымен бірігіп, Египеттегі жағдайды күшпен баспақ болған.

Ал, Мүрсидің өзі болса тағылған айыптардың барлығынан бас тартып отыр. Тіпті, алдағы сот отырыстарында адвокатсыз өзін қорғайтынын мәлімдеді.

Естеріңізге салайық, Мұхаммед Мүрси 2013 жылдың 3 шілдесінде тақтан тайдырылды. Тыңшылықтан бөлек оған полиция қызметкерлерін өлтіртті деген айып та қоса тағылып отыр.