Меркі ауданына қарасты елді-мекен мешіттері қасиетті болған Зұлхижжа айы туралы уағыз-насихат жүргізді.

Мешіт қызметкерлері: «Зұлхижжа айы мұсылмандар үшін аса құрметті де және ардақты айлардың бірі. Алла Тағала қасиетті Құранның «Фәжр» сүресінің алғашқы екі аятында: «Таң шапағына серт. Және (мүбәрәк) он түнге серт», – деп айтқан.

Ибн Аббас (Алла оған разы болсын) аталмыш аятты: «Бұл аятта зұлхижжа айының алғашқы он күніне байланысты айтылған», – деп тәпсірлеген.  Алла Тағаланың қасиетті Құранда қандай да бір затпен ант етуі – сол заттың маңыздылығын білдіреді.

Ардақты Пайғамбарымыз (оған Алланың салауаты мен сәлемі болсын):

«Алла Тағалаға осы (он) күнде істелген игі істен жақсырақ амал жоқ», – деді. Сахабалар: «Уа, Алланың Елшісі! Сонда Алла жолындағы күресу де оған тең келмей ме?» – деп сұрады. Алла Елшісі (оған Алланың салауаты мен сәлемі болсын): «Алла жолында күресу де оған тең келмейді. Тек жанымен әрі малымен күресіп, кері қайтпаған адамның жағдайы бөлек», – деп жауап берген (имам Бұхари).

Бұл айда негізгі атқарылатын амалдар: Қажылық, арапа күні ораза тұту, тәкбір ташриқ айту, айт намазын оқу және құрбан шалу», - деп, бұл айдың ерекшелігін атап өтті.

Уағыз соңында елімізге, жерімізге дұға жасалып, намаз оқылып тарқасты.

Меркі аудандық «Меркі ата» мешітінің баспасөз қызметі