Меркі ауданы, Сұрат ауылы «Сұрат» мешітінің имамы Азамат Оразқұлұлы мешітке жиналған жамағатқа «Отанды сүю иманнан» тақырыбында уағыз айтты.

Имам өз сөзінде: «Туған елге, жерге, Отанға деген сүйіспеншілік − әрбір жан үшін аса киелі ұғым, ыстық сезім. Отан дегеніміз туып-өскен отбасымыз, ата-анамыз, ауасын жұтып, суын ішіп жүрген, кең-байтақ атамекеніміз. Міне, осы туған ел мен жерге ие болу, амандығын тілеу әрбір мұсылманның діни әрі азаматтық  борышы.

Әркімнің де өсіп-өнетін жері – оның Отаны. Адам туған жерін, Отанын қастерлеп, қадіріне жете білуі тиіс. «Отан қадіріне жетпеген өз қадіріне жетпейді» халық нақылы. Ендеше туған жері мен елін құрметтеу, оның даңқын асыру әрбір азаматтың қастерлі борышы.

Жалпы отаншылдық, патриотизм асыл дініміздің ұстанымымен ұштасып жатқан ұғымдар. Исламда «хуббул-уатан минәл-иман» деген риуаят бар. Мағынасы «Отанды сүю иманнан» дегенді білдіреді. 

Біз жастарымызға осы жерге, осы елге деген ұлы махаббатты өз еліне, өз жеріне қызмет етумен, өсіп өнуі үшін аянбай тер төгумен көрсетуі керек екенін жеткізуіміз керек» - деп, сөзін аяқтады.

Уағыз соңынан намаз оқылып, елімізге, жерімізге дұға жасап тарқасты.

Меркі аудандық «Меркі ата» мешітінің баспасөз қызметі