Асыл дініміздің діңгегі, тірегі, ол – Құран. Хақ Тағаланың сөзі, үкімі әр мұсылманды екі дүниенің бақытына жетелейтіні баршамызға аян.

Шу ауданы, Тасөткел ауылында мешітіміздің бас имамы Әбдіқадір Балықбаевтың  қолдауымен және  мешіт жамағатының ұйымдастыруымен Қасиетті Құранды оқып-жаттап, білімін толықтыра түскен шәкірттер арасында жарыс ұйымдастырылды. Ардақты Пайғамбарымыз (Алланың оған игілігі мен сәлемі болсын): «Сендердің ең жақсыларың Құранды үйреніп, оны өзгеге үйреткендерің» ,- дегендей, ауылымыздың жас жеткіншектері Құраннан дәріс алып, діни ілімдерін арттырды. Осы орайда, сауапты іске ат салысып, балаларды ілім нұрымен сусындатқан Әлібек Жорабек және Омар Шотан ұстаздарымызға ерекше алғыс айтамыз.

Әділ қазы алқасының мүшелері жарысқа қатысқалы отырған шәкірттерге және жамағатқа Құран Кәрімді өз ережесіне сәйкес тәжуидпен оқудың маңыздылығы жөнінде уағыз айтып, қатысушыларға сәттілік тілей отыра, жарыстың ережелерімен таныстырды. Жарыс шарттары бойынша шәкірттер Құраннан қысқа сүрелер оқыды және сиар сұрақтарына жауап берді.

Нәтижесінде:

1 орын - Тұңғыш Зарина,

2 орын - Дәулетәлі Мәрлен,

3 орын - Бұқантай Гүлнұр иеленді.

Барлық жүлделі орын алушыларға құнды сыйлықтар берілді, сонымен қатар қатысушыларға естелік сыйлықтар таратылды.

Алдағы уақытта еліміздің әр қаласы мен ауылында осындай жарыстар жиі ұйымдастырылар болса, келешекте иман жүзді, салиқалы ұрпағымыз көбейері сөзсіз.

Жәпек  Фаризат

Шу аудандық мешітінің баспасөз қызметі