«Олар – қолдарындағы Тәурат пен Інжілде есімі мен сипаттары жазылған, хат танымайтын Пайғамбар әрі ең үлкен абыройлы Елшіге бойсұнады. Пайғамбар оларға жақсылықты бұйырып, жамандық атаулыдан тыяды, Алланың зиянсыз әрі таза етіп жаратқандарын – адал, зиянды әрі лас еткендерін – арам қылып, бұрын-соңды (көне шариғат заңдары бойынша) мойындарына жүктелген ауыртпалықтардан арылтып, тұсаудан босатуда. Пайғамбарға шынайы түрде иман етіп, барынша құрметтеп, жәрдем бергендер, сондай-ақ, онымен бірге түсірілген Нұрға (Құранға) ергендер, міне, солар (дүние мен ақыретте) шынайы табыс пен жетістікке жеткендер».

«Мұхаммед – Алланың елшісі. Қасындағы мүміндер кәпірлерге тым қатал, өзара (бір-біріне) өте мейірімді. Әрдайым рукуғ , сәжде жасап, Алладан игілік пен разылық тілегенін көресің. Олардың белгісі – жүздеріндегі сәжденің ізі мен нұры. Бұл – Тәураттағы сипаттары. Ал, Інжілде болса: «Олар – бүршік жарып, оны қуаттандырып, сабағы да жуандап, бой көтерген егін тәрізді», – деп айтылған. Осылайша олар өздерін еккен дихандарды таң қалдырса, ол кәпірлердің ашу-ызасын келтіреді. Міне, Алла тағала солар сияқты иман келтіріп, сол иман негізінде ізгі амал жасағандарды жарылқау мен үлкен сыйға бөлеуге уәде берді» («Фәтх», 48/29).

asyldin.kz