Ең табысты кәсіптің сауда екені баршамызға мәлім. Саудамен айналысатын адам ісіне сенімді, шыншыл болуы керек. Бір сөзбен айтқанда, оның өзіне ұнамайтын нәрсені өзге мұсылман бауырына қатысты жасамауы тиіс («Ихъя улюм ад-дин»). Бес жүз теңгеге де тұрмайтын нәрсені мың теңгеден сату – бұл өзін де, мұсылман бауырын да алдау болып табылады. Мұндай табыста қайыр да береке де болмайды. Төменде мұсылман саудагерлер үшін сауданы берекелі де қайырлы жүргізудің 8 қағидасын келтіреміз:  

1. Саудагер әрқашан шыншыл болуы керек. Біздің сүйікті Пайғамбарымыз (ﷺ) былай айтқан: «Шыншыл саудагер Қиямет күні тақуалар мен дін жолында шейіт болғандармен бірге тіріледі» (Ибн Маджа, Тиджарет, 1; Тирмизи, Буйу, 4; Ахмад б. Ханбал “Муснад”, 3/437)
2. Саудагердің сауда жасауда батыл болуы – сүннет. Ол үнемі өзіне табыс әкелетін іспен айналысуы керек. Алла Елшісі (ﷺ) бұл жөнінде былай айтқан: «Адам өзіне береке беретін іспен айналысуын жалғастыруы қажет».
3. Саудада Бір Аллаға ғана сенім артып, тек Одан ғана ризық пен тиімді мәмілені күту керек.
4. Мұсылман өзі сатып алайын деп тұрған тауарын жер-жебіріне жетіп балағаттамайды әрі өзі сатып тұрған тауарын қатты мақтамайды.
5. Бай тәжірибесі бар әрі терең ілімге ие адам ғана өз саудасын шариғат қағидаларына толықтай сәйкес етіп ұйымдастыра алады.
6. Тауарының сапасы сондай жақсы болып тұрса да саудагер сапаның мықтылығын айтып ант-су ішіп, сатып алушыны көндірмеуі керек.
7. Саудада арамдық болмауы тиіс.
8. Саудагер өзінің тауарын нарықтық бағадан екі есе қымбат сатпауы қажет.

asyldin.kz