Құрбандыққа шалынған малдың еті үш күнде таратылып кетуі тиіс деген рас па? Ал егер мұсылман осы үш күнде сойылған малдың етін таратып үлгермесе ше? Расында, алғашында Алла Елшісі (ﷺ) өзінің сахабаларына құрбандыққа шалынған малдың етін үш күннің ішінде жеуге және таратуға бұйырған болатын, яни сақтап қалдыртпаған. Алайда кейін келе бұл бұйрықтың күші жойылған. Хадисте былай айтылған: «Мен етті үш күнде жеуді бұйырған едім, алайда енді қалағандарыңша жеулеріңе болады» (Аш-Шавкяни  М. Нейль әл-автар. Т. 5. С. 136, хадис № 2128).

Естеріңізге сала кетсек, құрбандыққа шалынған малдың еті туған-туыстарға, өз отбасына және мұқтаж жандарға деп үшке бөлінеді. Қасиетті Құранда былай айтылған: «Олар өздеріне тән пайдаларын көрсін. Сондай-ақ өздеріне берілген малдардан белгілі күндерде Алланың атын алсын. Одан өздерің де жеңдер және жоқ-жітікке де жегізіңдер» (22:28). Егер құрбандық шалған адам ауқатты болса, онда ол өз қалауы бойынша еттің бәрін мұқтаж жандарға таратып беруіне болады.

Ал егер құрбандық шалған адамның жанұясы үлкен болса әрі өзі ауқатты болмаса, онда ол өзіне еттің үлкен бөлігін қалдыра алады, өйткені отбасы қажеттілігі абзал міндет болып табылады.

 asyldin.kz