"Һибатулла Тарази" мешітінде ҚМДБ-ның Жамбыл облысындағы Әйел-қыздар секторының ұйымдастыруымен "Отан отбасынан басталады" атты отбасылық сайыс өтті. Әр шаңырақтың өзіндік ұстанымымен, ұлт өкілдерінің салт-дәстүрімен танысу мақсатында жасалған іс-шараға 4 жанұя қатысты. 

Дүбірлі сайыс шарттары бойынша әр қатысушы өз отбасын өлең шумақтарымен таныстыруы керек, отбасына байланысты сонымен қатар салт-дәстүрге байланысты сұрақтарға жауап беруі тиіс. Үшінші тапсырма бойынша әр жанұя ұлттық тағамдарын дайындап, көрсетіп, баяндайды, төртінші, отбасыдағы кішкентай бүлдіршіндер Қасиетті Құран сүрелерін жатқа оқиды, бесінші, мақал-мәтел жарысы. 

5 бөлім бойынша тартысты өткен отбасылық сайыста 1 орынды мешіттің шәкірті әрі ақжаулықты әжесі Райхан апаның шаңырағы иеленді. Барлығы бірдей қазақ ұлттық киімін киіп, ауызбіршілігімен алға шыққан ардақты апаның тобы отбасылық құндылықтардың маңыздылығын насихаттады. Ал 2 орынды дүнген отбасын бастап келген Фарида Камалова алса, 3 орын Жібек апаның шаңырағы мен Ақмарал келіншектің тобына бұйырды. Барлық жүлдегерлерге бағалы сыйлықтар табысталды.

Іс-шара соңынан ақ дастархан жайылып, барлық қатысушылар мен көрермендер ас ішіп, бір-бірімен таныса түсті. 

Мешіттің ұлағатты ұстазы, сектор жетекшісі Гүлжан Алдасаева мен "Кеңесхан қажы" мешітінің ұстазы Жібек Қолағұлова сөз сөйлеп, көпшілікке насихат айтты.

Гүлжан Алдасаева өз сөзінде: "Отбасы - адам өміріндегі басты фактор. Оны гүлдендіру, жайқалған бақша жасау - біз әйелдердің қолында. Шариғатымыз отбасыға, ондағы әрбір адамға, олардың әдебі мен құқығына ерекше көңіл бөледі. Тіпті пайғамбарымыз (с.ғ.с.) да исламды насихаттауды өз отбасынан бастаған," - деп атап өтті. 

Мұндай ерекше шара қазіргі қоғам үшін аса қажет. Өйткені осындай жиында өз отбасымызбен бірге әрекет жасай отырып, бір-біріміздің қадірімізді түсінеміз.

Ақерке БЕКҚҰЛОВА,

"Һибатулла Тарази" мешітінің баспасөз қызметі.