Мінекей, көптен асыға күткен құт айы Рамазан да өзінің соңғы күндерін өткізіп, қасиетті мол Қадір түніне жеттік. Алла Тағала оны берекелі етті, онда Құранды түсіріп, басқа түндерден  ерекшеледі. Аудандық «Қордай» мешітінің жамағаты мың айдан қайырлы, дұғалар қабыл, сауабы 83 жылдан асатын қасиетті Қадір түнін ерекше құлшылықпен қарсы алды. Қадір түнін мешіт ұжымы жоғары дайындықпен өткізді.

Рамазан айы бойы үзілмеген ауызашарда Қадір түнінде жомарт бауырларымыздың себебінен өз жалғасын тауып, Қадір түнінде де ауызашар берілді. Құптан намазына мешітке келген  жамағат сыймай кетті, бастырма асты да толды. Бас имам Дәуренбек Жандосұлы жиналған қауымға осы түннің нығметі турасында әсерлі уағыз айтты. Қасиетті түнде Рамазан айы бойы түсірілген толық Құран хатымы аяқталып, хатым дұғасы жасалынды.

Тарауих намазы арасында аудандық «Қордай» мешітінің имамдары дайындаған сұрақ-жауап айдары болды. Бас жүлдеге Құран Кәрім тәпсірі және ұялы телефон, екінші күрделі сұраққа жауап бергенге шаңсорғыш, Алла елшісінің  (с.ғ.с) өмірбаяны сияқты  сыйлықтар тігіліп, үлкен-кіші болып білім сайысына жамағат белсене қатысып, бағалы сыйлықтарға йе болды.

Тарауихтың біреуін қаза етпеген, мешіттен ораза бойы табылған Жандос бауырымызға да мешіт атынан кілем сыйлыққа берілді. Мешіт имамдары кешті өзінің уағыздарымен безендіріп жалғастыра кетті. Дін жанашырларының демеушілігімен асханада жиналған жамағатқа сәресі дастарханы жайылып, бауырларымыз  ауыздарын бекітіп, келесі күннің оразасына ниет етті. Жиналған қауымның сөзіне жүгінсек бұл түн ерекше түн, рухани кемелдену түні, мұсылмандық бауырмашылдықты нығайтатын түн, иман деңгейінің көтерілуіне үлкен септігін тигізген түн болды деп  разылықтарын білдіріп, алғыстарын айтып жатты. Таң намазы оқылып, дұға жасалып, жамағат үйлеріне тарқасты. Раббымыз осындай ұлық күнде жасалған ғибадат құлшылықтарымызды, дұғаларымызды қабыл еткей!

Аудандық «Қордай» мешітінің баспасөз қызметі