Тараз қаласы «Қарабай ата» мешітінде жамағатқа көркем әдеп турасында үгіт-насихат жүргізілді. Қазақ халқында сақталған әдептілік дәрістерінен нағыз мұсылман ұстанымының көрінісін көреміз. Солардың бірі - дастарқан әдебі туралы айтылды.
Халық санасында дастарқан мен асты ерекше қастерлеп, қадірлейді. Халық санасында сақталған сол әдептерді хадис-шәрифтермен ұштастыра білген. Дастарқанға отырғанда Алланың атын ауызға алып, тамақты табақтың жақын жерінен оң қолмен алып жеу ата-бабадан келе жатқан дәстүрлі әдеп.
Бұл Пайғамбардың (оған Алланың салауаты мен сәлемі болсын) өсиеттерінен алынған өнегелер. Омар ибн Әбу Сәләмә (р.а.) былай дейді: «Маған Алланың Елшісі (оған Алланың салауаты мен сәлемі болсын): «Уа, бала! Алланың атын атап, оң қолыңмен же. Өзіңе жақын жерден же», – деп айтты». Асты ала бастағанда Алланың есімін айтуды ұмытып, кейіннен есіне түсірсе, «алдында да, аяғында да Бисмилла» десе болады.
"Әулие ата" мешітінің баспасөз қызметі