Абдулла ибн Аббастан жеткен риуаятта Алла Елшісінің (ﷺ) былай айтқаны келтірілген: «Маған Тозақ көрсетілді. Ол жердің басым көпшілігі шүкіршілігі жоқ әйелдер болды». Сонда сахабалар: «Олардың Аллаға деген шүкірлігі болмаған ба?» - деп сұрайды. Алла Елшісі (ﷺ) былай жауап берген: «Олар күйеулерінің оларға деген жақсы қарым-қатынастарына шүкір айтпағандар. Бұл әйелдерге жылдар бойы жақсылық жасалынады, бірақ егер бір рет оларға ұнамсыз нәрсе жасалып қалса, олар: «Сенен ешқашан бір жақсылық көрген емеспін», - деп айтады» (Бұхари, Иман, 21; Мүслим, Иман, 132).

Бұл сенімді хадисті Бұхари мен Мүслим келтірген.

Аталмыш хадистің негізгі тақырыбы — шүкіршілік етпеу болып табылады.  Еркектердің әйелдерде құқығы бар болғандай, сөзсіз, әйелдердің де еркектерде құқығы бар. Рақмет айтпау, шүкіршілік етпеу, алғыстың болмауы — жанұя бақытын бұзатын фактор болып табылады. Ал Алла Елшісі (ﷺ) дәл осыған ерекше мән берген еді.  

Келесі хадисте өте маңызды нәрсе айтылған: «Кімде-кімнің адамдарға алғысы болмаса, оның Аллаға да алғысы болмайды». Бұл хадисте әйелдердің рақметінің жоқтығы, олардың Алла Тағалаға да рақметінің жоқтығының белгісі болып табылатындығы көрсетілген (Ибн Хаджар, Фатхул-Бари, 83).

Егер ер адамдар да рақметсіз болса, онда бұл жағдайда, хадистерде көрсетілгендей олар да дәл әйелдер сияқты қауіпте болады.

asyldin.kz