Алла Тағала Қасиетті Құран-Кәрімді 23 жыл бойы Жәбірейіл періште (а.с.) арқылы  екі дүние сардар Пайғамбары Мұхаммедке (ﷺ) түсіріп отырған. Құран  Рамазан айында түскендіктен, оны Құран айы деп те айтуға болады.  Алла Тағаланың жаратқан пендесі күні мен түнін Құран оқумен өткізсе, хадиске сай Алла Тағаланың қалауымен Құран-Кәрім Қиямет күні шапағатшы болады. Алайда Құран оқу мүмін адамға барынша пайда келтіргенін қаласа, онда ол Алла Елшісінің (ﷺ) келтірген бірнеше ережелеріне көңіл қоюы керек:

Құран оқу алдында дәрет алу

Құранда былай айтылған: «Оны тап-таза болғандар ғана ұстайды» (56:79).

Құранды дәретсіз ұстауға болмайды.

Оқу көлемі

 Айша анамыздың (р.а.) айтуынша: «Пайғамбарымыз (ﷺ) Құранды үш күнде оқып болатын!»  Имам Бадруддин әл-Айни былай деген: «Бұл хадистің мәні мынада – үш күннен аз уақытта Құранды оқып болатын адам, Құран оқудан алар дүниелерді жіберіп алады!» Сондай-ақ, Әбу Жамра былай айтқан екен: «Бір күні мен Ибн Аббасқа былай айттым: «Мен Құранды тез оқитын адаммын, бір түнде мен Құранды бір немесе екі рет оқып шығамын!» Сонда Ибн Аббас оған былай айтыпты: «Маған сенің жасағаныңа қарағанда, бір түнде бір сүрені оқу көп ұнамды!» Демек, Құран оқуда асықпау керек, өйткені асығып оқу оны дұрыс оқуға әрі аяттардың мәнін байыбына жете түсінуге кедергі  келтіреді. 

Дауыстап әдемі дауыспен әндетіп оқу

Құранды әдемі дауыспен әндетіп оқыған жөн. Айша анамыздың (р.а.) келтіргені бойынша, Алла Елшісі (ﷺ) былай айтқан екен: «Кімде-кім Құранды қиналып, бірақ ынтамен оқитын болса, екі есе сауап алады» (Мүслім). 

Сондай-ақ, басқа хадисте былай айтылған: «Кімде-кім Құранды оқығанда әрбір дыбысын анық та айқын әрі әдемі дауыспен әндетіп оқымаса, ол бізден емес».

Сәждеге жығылу

Қасиетті Құрандағы 14 аятты оқу барысында сәжде жасау керек. Мысалы,  «Сәжде» сүресінің 15 аятында былай айтылған: «…Шын мәнінде аяттарымызға, өздеріне үгіт берілген кезде, сәждеге жығылып; Раббыларын мақтап, пәктейді. Сондай-ақ тәкаппарланбай иман келтіреді».

Аяттарды оқу дұға мен Алланы еске алумен бірге айтылуы

Хузайфа әл-Йамани былай айтқан: «Бір күні мен Алла Елшісімен (ﷺ) бірге құлшылық еттім. Ол «Бақара» сүресін оқи бастап, рақымшылық сөзі бар аятты оқып болмай жатып, Алладан рақым тіледі, Алланың жазалауы бар аятты оқып болмай жатып, одан сақтауын сұрады және Алла бәрінен де артық деген сөздері бар аятты оқып болмай жатып  «СубханаЛла!» деп айтқан».

Әр түрлі тәсілмен оқу

Бір күні Алла Елшісі (ﷺ) өзінің үш сахабасының қасынан өтіп бара жатып, үшеуінің Құранды әртүрлі оқып отырғанын байқап қалғандығы келтірілген. Үнсіз оқып отырған Әбу Бәкірге (р.а.) жақындап, неге бұлай оқып отырғанын сұрайды, сонда Әбу Бәкір: «Шындығында, мен сыйынатын мені естиді», - деп жауап береді. Пайғамбарымыз (ﷺ) Омарға (р.а.) жақындап келіп оның бұлай оқу мәнісін сұрайды, сонда ол: «Ұйықтап жатқандарды оятып, шайтандарды қуамын», - деп айтады. Пайғамбарымыз (ﷺ) Біләл әл-Хабашқа жақындап келеді, ол бір сүренің бірнеше аятын оқып және басқа сүренің аяттарын оқып отырған еді. Бұлай оқуының мәнісін сұрағанда, Біләл: «Мен үздіктерді үздіктермен араластырамын», - деп жауап берген екен. Сонда Пайғамбарымыз (ﷺ) оларға былай айтқан екен: «Әрқайсың да ең жақсы тәсілмен дұрыс оқып отырсыңдар». 

Егер адам Құран оқи алмайтын болса, онда ол оны тыңдау арқылы сауапқа кенеле алады. Өйткені Алла Елшісі (ﷺ) былай айтқан: «Кімде-кім Алланың Кітабынан аят тыңдайтын болса, ол оған Қиямет күні нұр болады».

Алла Тағала біздің Құранға деген сүйіспеншілігімізді арттыруға көмектесіп әрі Өзінің Кітабынан оқылған не тыңдалған әрбір әріпті бізге сауаптан жазсын!

asyldin.kz