ҚМДБ-ның Жамбыл облысы бойынша өкілдігінің ұйымдастыруымен бүгін облыстық орталық «Һибатулла Тарази» мешітінде «Жат ағымдарға қарсы күрес» тақырыбында  жергілікті ақпараттық насихат тобы (ЖАНТ) мүшелерінің кездесуі өтті.

Жиында ҚМДБ-ның Жамбыл облысы бойынша өкіл имамы Данияр қажы Әлимұхамедұлы:

«Жат ағымдардың алдын алу, онымен күресте имамдардың белсенділігін арттыру, бүгінгі таңдағы келелі міндеттердің бірі. Бүгінгі басқосудың нәтижесінде біз ЖАНТ мүшелері, нақты міндеттер белгілеп, жамағатпен бірлесе отырып, нәтижелі қызмет атқару үшін арнайы жоспар жасадық. Жүйелі жұмыстар оң нәтиже беруі тиіс», - дей келе, өңірдегі имамдарға бүгінгі таңда ерекше міндет жүктеліп отырғандығын жеткізді. 

Жат ағымдардың алдын алу мақсатында алдағы уақытта Тараз қаласындағы «Шейх Зуннун» мешіті мен Шу қаласындағы «Әбу Бәкір Сыддық» мешітінің теріс ағымдағы жамағатымен арнайы жұмыс жасау үшін апталық дастархандар, уағыздар ұйымдастырып тұру қолға алынбақ.

Сонымен қатар, жат ағымдағы жамағатқа фиқһ, ақида пәндерін жүргізіліп тұруы бекітілді. Алдағы уақытта мешіттерде жат ағымға қарсы брошюралар мен буклеттер басып шығару, арнайы роликтер түсіру жоспарға енгізілді.

«Һибатулла Тарази» мешітінің Баспасөз қызметі