XIII мәскеулік «Рамазан шатырының» салтанатты түрде ашылу рәсімі Мәскеудегі Поклонная тауындағы Мемориалды мешітінің маңында өтті. «Рамазан шатыры» — өз меймандарын әлем халықтарының мәдениеті және дәстүрімен таныстыратын, арнайы түрде қасиетті Рамазан айының келуіне ыңғайластырып жасалған мәдени-ағарту жоба.
«Бұл жоба аясында қасиетті ай бойы күнделікті тақырыптық кештер, интерактивтер, сұрақ-жауаптар әрі құрметті меймандармен кездесулер өткізіліп тұратын болады. Ағымдағы жылы аталмыш жоба өзінің тарихындағы ең ауқымдысы болмақ, өйткені күніне 500-дей меймандарды қабылдай алатын болады», - деп мәлімдейді ұйымдастырушылар.
Рамазан айы бойы алаңға келушілер үшін Ресейдің ұлттық республикаларының, таяу және алыс шетелдердің, соның ішінде, Тәжікстан, Ингушетия, Карачаево-Черкесия, Дағыстан, Түркменстан, Қазақстан, Өзбекстан, Татарстан, ұйғыр диаспорасы, Түркия және өзге де елдердің кештері өткізіліп тұратын болады.
asyldin.kz