РАНТ мүшесі, Теміртау қаласының бас имамы Жанболат Жұматұрұлы Тараз қалалық «Әлі ата» мешітінде жамағатқа уағыз айтты.

Исламдағы ой тазалығы жайында насихат айтқан Жанболат Жұматұрұлы: «Ислам діні жақсы ойлауға тәрбиелейді. Ой тазалығы мұсылман үшін өте маңызды амалдың бірі. Өйткені, ой адам тағдырына әсер етеді. Асыл дініміз жақын бауырымыз, туысқанымыз, тіпті танымайтын бөгде адам туралы жақсы ойда болуға үйретеді. Ойы таза адамның тәні де таза болмақ. Алла Тағала қасиетті Құранда былай дейді:

«Уа, иман келтірген жандар! Тым күмәншіл болудан сақ болыңдар. Өйткені, кейбір күмәндар күнә болады. Бір-бірлеріңнің сыртынан жасырынып, аңдып, бақыламаңдар, бір-бірлеріңнің сыртынан ғайбат айтып, жамандамаңдар да. Өлген бауырларыңның етін жегенді қалайсыңдар ма? Әрине, ол – жиіркенішті нәрсе. Ендеше, Құдайдан қорқыңдар! Тәубеге келіп кешірім сұрағандарды Алла жақсы көреді. Ол – Рахымды» («Әл-Хужурат» сүресі, 12-аят). Хақ Тағала баршамызға ойымыз бен тәніміздің таза болуын нәсіп еткей» деді.

Уағыздан кейін имам ел игілігі мен бірлігі үшін арнайы дұға жасады.