Жамбыл облысы Байзақ ауданына  қарасты ауыл имам-молдаларының ұйымдастыруымен «Ар Рахман» мешітінде мектепке жол науқаны өтіп, 100 балаға мектепке керек-жарақ салынған сөмкелер таратылды.

Айтулы шараға Байзақ ауданының бас имамы Қанат Әділханұлы арнайы қатысып: «Шариғат тілінде «білім» сөзі – бір мәселені жан-жақты, анық-қанығына дейін жіті түсіну деген мағынаны білдіреді. Білім – ақылдылық пен парасаттылыққа жол сілтейді. Ал, білімсіздік мұның қайшы мағынасы. Ақылды адам ой-қабілетімен бірнәрсені түсінуге тырысады. Ал, надан басындағы ақылын, бойындағы қабілетін дұрыс қолдана алмайды. Сондықтан, білімді адам – жарық шам секілді. Білімсіз надан – қараңғы түн сияқты»,- деп білім алудың артықшылығы жайында насихатын айтып оқушыларға білім жолында сәттілік тіледі.

Бұл қайырымдылық шараға ауданға қарасты барлық ауылдардан әулеметтік жағдайы төмен мүмкіндігі шектеулі жандар тартылып, 100 ұл-қызға оқу жабдықтары салынған 100 сөмке үлестірілді. Қайрымдылыққа әр ауылдан 3 оқушы әрі аудан орталығынан 10 оқушы қамтылды. Жұмсалған қаражат саны 1000 000 теңгені құрады.