Уақыттың соңында әһлү әл-бейттен бір адам пайда болады, ол әділетсіздік пен өтірікке батқан әлемді әділдік пен адалдыққа толтыратын болады. Бұл бөлімді, әсіресе, қазіргі кезде оқып-білу маңызды, өйткені ұдайы имам әл-Махдидің шығуы туралы бітпейтін әңгімелер айтылуда, әртүрлі сыбыстар мен ойдан шығарылған, жалған дүниелерге алданып қалмас үшін,  Әһлү Сүннет әл-Жамағаттың сенімді дереккөздерінде имам әл-Махди туралы не айтылғаны жөнінде білу қажет.

Бұл адам жеті жыл билік етеді және оның билік жүргізген уақытында Алла Тағала адамдарға береке мен рақымын төгеді: жер құнарлы болады, жаңбыр мол болады, ал байлықтың көп болатындығы сонша, адамдар оны қайда жұмсарларын білмейтін болады. Ибн Касир былай айтқан: «Оның кезінде жемістер көп болады, өнім мол болады, ақша өте көп болады, билеуші мықты болады, дін жеңіп, дұшпан жеңіліс табады, ал сол күндері игілік толассыз болады» (Ан-Нихая, 1/31). Осы кезеңнің алдында, мұсылмандардың көптігіне қарамастан, олар жеңіліс тауып, талқандалған: мұсылмандардың саны оларға жауды жеңуге не күш, не жеңіс бермеген уақыт болған.