Меркі ауданының бас имамы Азамат Берікұлының ұйымдастыруымен аудандық орталық «Меркі ата» мешітінде «Ислам және ізгі қоғам» жылы аясында ҚМДБ бекіткен 5 бағыттың бірі – жат ағымнан алдын алу мақсатында «Деструктивті бағыт – дін емес» атты семинар өтті.

Аталмыш семинарға Меркі ауданына қарасты дін қызметкерлері қатысты. Қоғамда өзекті болған жат ағыммен күрес жолдары талқыланып, әдіс-тәсілдер қолдану арқылы деструктивті діни бағыттардың алдын-алу бойынша жұмыстар пысықталды.

Семинарда Азамат Берікұлы сөз сөйлеп: «Ең бірінші қызметкердің өзі білімді болу керек деп, жат ағым өкілдерімен жұмыс жасаудың қыр-сырымен бөлісіп, дін қызметкерлерінің көкейінде жүрген сұрақтарына жауап берді. Екінші адамды жат ағымдардың жетегінде кетуден тосатын бірден-бір дүние – салт-дәстүрімізді берік ұстану. Дәстүрімізді дәріптеп насихаттау керек. Әлбетте, басқа түскен індеттен қашып емес, шешіп қана құтыла аламыз», - деп атап өтті.

Семинар соңында қатысушыларды сыни ойлауға көңіл бөлуге, ғаламтор мен әлеуметтік желілердің мүмкіндіктерін сауатты пайдалануға шақырды.

Меркі аудандық «Меркі ата» мешітінің баспасөз қызметі