Халықаралық футбол федерациясының президенті Джанни Инфантино Катарда өткен әлем чемпионатын ұйымдастыру жағынан алғанда әлем чемпионаттары тарихындағы ең үздік деп бағалады. Мұндай бағалаудың негізгі дәлелдерінің бірі турнир матчтарына келген көрермендер саны болды, бұл оны бұрынғы әлем чемпионаттарынан ерекшелендіреді. 

«ФИФА-ның Катарда өткен әлем чемпионатынан түскен табысы 7,5 миллиард долларды құрайды. Бұл төрт жыл бұрынғы көрсеткіштен миллиардқа көп. Турнир матчтарын 3,27 миллион көрермен тамашалады, Ресейде 3,03 миллион көрермен болды», - деп келтіреді Marca Инфантиноның сөзін.

«Бұл тарихтағы ең үздік әлем чемпионаты болды. Осыған атсалысқандардың барлығына рақмет. Марокко құрамасын бөлек атап өтіп, әйел төрешілерді мақтаймын», - деді ол. Инфантино рекордтық көрсеткішке ие 48 команда қатысатын 2026 жылғы әлем чемпионатының соңғы форматы кейінірек шешілетінін айтты.

asyldin.kz