Меркі ауданына қарасты, Кеңес ауылы «Ар-Раззақ» мешітінің имамы Нұрбол Айдосұлы жергілікті әкімшілік ғимаратында ауыл қауымдастығы мүшелерімен кездесті. Кездесу барысында қоғамға, жалпы адамзатқа кері әсерін тигізетін «Арақтан келетін зиян» туралы  сөз айтылды.

Кездесуде сөз сөйлеген имам: «Қасиетті Құран Кәрімде ішімдік ішудің күнә, әрі барлық қылмыстың бастауы екендігі баян етілген. Алла Тағала «Маида» сүресінің аяттарында айтады: «Ей, иман келтіргендер! Арақ ішу, құмар ойнау, пұтқа табыну, оқпен бал ашып бәсекелесу – шайтан ісі, жиіркенішті қылықтар. Бақытқа жетем дегендер шайтан ісінен аулақ болыңдар. Сол арақ, құмар ойнау арқылы шайтан сендердің араларыңа дұшпандық-ғадауат тудырады, сендердің намаз оқуларыңа кедергі жасамақ болады. Тәңірді естеріңнен шығаруға тырысады. Арақ пен құмар ойнаудан сонда да безбейсіңдер ме?» - деп, бұл жамандық атаулыдан аулақ болуға шақырады.

 Және Пайғамбарымыз (оған Алланың салауаты мен сәлемі болсын) араққа байланысты он кісіге лағынет айтқан: «Арақты сығушы, сығуға тапсырыс беруші, ішуші, тасушы, алдыртушы, құюшы, сатушы, арақтан түскен пайданы жеуші, арақты сатып алушы және сатып алдырушы» – деп баяндалған. Сондықтан ол нәрседен бойымызды аулақ ұстауымыз керек деп сөзін аяқтады.

Меркі аудандық «Меркі ата» мешітінің баспасөз қызметі