Нөкерлерін ерткен Хажжаж Мекке мен Мәдина арасында жолаушылап кетіп бара жатып бір бұлақтың басында тынығуды жөн көреді. Дастархан жайылғанда, Хажжаж «Маңайға қараңдаршы, жағдайы нашар біреу-міреу кезіксе шақырыңдар, астан ауыз тисін», - дейді. Нөкерлер үстіне ілген ескі шапаны бар біреуді тауып, ұйықтап жатқан жерінен оятып ертіп келді.

Хажжаж оған: – Кел, бірге тамақтанайық, – дейді.
Әлгі адам: «жемеймін», - деп астан бас тартады. Хажжаж себебін сұрағанда, «Мені бұдан да артық дастархан күтіп тұр», – деп жауап береді.
– Ол қандай дастархан? – дегенде, – Алла Тағалаға қонақ болуға шақырылдым, мен ауыз бекіткен жанмын, – деді.
Хажжаж: – Мынадай ми қайнаған уақытта қайтіп ауыз бекітіп жүрсің? – деп таңырқағанда, ол: – Иә, қияметтің ыстығынан қорғану үшін осы ыстықта шыдап ораза ұстап жүрмін, – деп жауап берген екен.

asyldin.kz