Құранды телефонға аудио турінде жазып тыңдауға болаы ма?  Егер тыңдауға болатын болса қандай жерлерге сол телефонмен кіруге болмайды?

Дәурен

Тыңдауға болады. Ласты жерлерге яғни дәретхана, монша .. т. б жерлерде тыңдауға болмайды.

Мен 5 уақыт намаз оқимын. Жасым 17-де.  Мұсылманмын. Шариғат бойынша қызбен жүруім дұрыс па, бұрыс па?

Мейрамбек 

Намазыңызды Аллаһ қабыл етсін. Қызбен егер жақын аралықта үйленуге ниет болса, рұқсат.

Қазақтық сусыны боза халал ма? Әлде харамға жатады ма?

Уақты өтіп кеткен және ашып кеткені болса ішуге болмайды, себебі мастық әсер береді. Жаңа дайындалған, ашымаған болса рұқсат.

Жақында  БҚО- да жерлеу кезіндегі қаралы митингіде беделді апайымыз көңіл айтып сөйлегеннен кейін, жергілікті мешіттің имамы (жерлеуге жетекшілік етуші өзі) мен әйелдің сөйлейтінін білмедім шариғатқа қарсы енді жаназа оқуға болмайды деп көптің алдында өрескел қылық көрсетті. Дұрыс болмаған жағдайда жер тепкілемей жайлап түсіндіруге де болатындай. Қайтыс болған кісі  45 жыл ұстаздық еткен батыр ана еді.  Сұрағым: 1.Шариғатқа қаралы митингі өткізу және аналардың сөйлеуі күнә ма? Өздері уағыз айтса «жұмақ әйел табаны астында» дейді. Жалпы әр имам әр түрлі сөйлейді, бір нақты талап әлі қалыптаспай келеді.

Нияз 

Жаназаның алдында сөз сөйлесе немесе митинг жасауына болады, тек мәйіттің бетін ашпаса болғаны. Рәсімнен кейін жаназасын имам шығара береді. Онда  ешқандай әбестік қайшылық жоқ.

Ақида жайлы бір сұрағым бар еді. Салафи ағымындағы бір жігіт маған бір сұрақ қойды: егер Аллах Тағала мекенсіз болса, онда неге Пайғамбарымыз (с.а.у.) бір түнді  айтты (қазір есімнен шығып кетті), сол түні 7 қабат аспанға көтерілді деді. Неге  деп қоя берді. Соған жауап берші. Егер шынымен Аллах Тағала мекенсіз болса, неге 7 қабат  аспанға көтерілді, деп өзіме сұрақ қойды. Соған жауап бере алмай қалдым. Сол  оқиға  жөнінде және сол оқиғадан нені түсінуге болады?

Айболат 

Миғраж түні. Ислам ғалымдары былай дейді: «Миғраж рух және денемен бірге жүзеге асты. Аятпен көрсетілгендіктен, Меккеден Құдысқа апарылғанына сенбеген адам кәпір болады. Көктерге, білінбейтін жерлерге апарылғанына сенбеген адам күнәхар болады».

Расулуллаһ миғражда жұмақты, тозақты, сансыз жерлерді көріп, күрси, арш және рух әлемдерінен өтіп, мекенсіз, уақытсыз, бағытсыз, сипатсыз түрде Аллаһу та’аланы көрді. Ешкім білмейтін, түсіне алмайтын ниғметтерге қауышып, бір сәтте Құдысқа, ол жерден Мекке-и Мүкаррамаға келді.

Имам Раббани былай деген:

Аллаһу та’ала уақытқа, мекенге, бағытқа тәуелді емес. Бір жерде, бір жақта емес. Уақытты, жерлерді, бағыттарды Ол жаратқан. Надандар Оны Арштың үстінде немесе жоғарыда аспанда деп ойлайды. Аршты да, жоғарыны да, төменді де Ол жаратқан. Кейіннен жаратылған нәрсе әзәли, бастаусыз болғанға мекен бола алмайды. Аллаһ зат, дене және газ емес. Ұқсасы, серігі, терісі жоқ. Білетін нәрсеміз, ойымызға, қиялымызға келетін барлық нәрсе Ол емес. Қандай екендігін түсіне алмаймыз, ойлана да алмаймыз. Ойға келген барлық нәрсе қате. Ол ғаламның ішінде де емес, сыртында да емес. Ішінде сыртында болу, бар болған екі нәрсе арасында ойланылады. Бұл ғалам қиял мәртебесінде жаратылған. Қиял мәртебесіндегі әлемнің тұрақты бар болып көрінуі Аллаһтың құдіретімен жүзеге асуда. (2/67)

Намазға ниет етіп, бастамақ ойым бар. Алайда  ата-анам тарапынан қарсылық туындап отыр. Ата-анама айтпай намаз бастап кетсем күнә болады ма екен? 

Қалай оқысаңызда күнә емес, керісінше ата-анаңызға сауап жазылады. Орталық мешітке ата-анаңызбен келіп ұстаздардан ақыл сұрасаңыз болады.

Мен тұрмысқа шықпай тұрып намаз оқитын едім. Тұрмыс құрған соң  оқымай кеттім. Қазір аяғым ауыр. Күйеуімнің дін жағынан хабары жоқ. Енді мен не істесем болады? күйеуімді қалай дінге жақындатсам болады?

Бақытгүл 

Дінде сол үшін қызды діндар жігітке беру мәселесіне көңіл бөлген. Намазыңызға бастағаныңыз жөн, намазды біз тастамаймыз намаз бізді тастайды. Жолдасыңызға да  түсіндіріңіз. Аллаһ жар болсын.

5 уақыт намазды бiрге қосып оқыса болады ма? Кешке немесе қай уақытта қосып оқыса болады?

Мадина

Ауру-сырқау немесе бір себептер арқылы намаз қаза болады. Қазаны да өтеу парыз. Мүмкін болған сайын орындайсыз.