Жер бетіндегі барлық мұсылман қауымы үшін ең қасиетті саналатын екі ұлық мерекенің бірі – Ораза айт мейрамы. Айт – қуаныш пен шаттыққа толы күн деген мағынаны немесе «мереке», «мейрам» деген ұғымды білдіреді. Алла Тағала айт сайын адам баласына әртүрлі жақсылықтар жаудырады. 

Осы айтулы ұлық мерекеге орай Жамбыл облысының рухани жүрегі болған «Һибатулла Тарази» мешітінің ұйытқы болуымен облыстағы аудандардан қалаға, қаладан ауданға қатынайтын қоғамдық көліктер мерекеге орай тегін қызмет көрсетті.

Барлық автобустарға «Ораза айт қабыл болсын!» деген құттықтаулар ілініп, жамағаттың жол жүруіне үлкен жеңілдік жасалды. Әрбір ауданның бас имамы жолаушыларға сәттілік тілеп, айт мерекесімен құттықтады.

Мұндай қайырымды іс-шараға тап болған жұртшылық шаттықпен ұйымдастырушыларға алғыстарын білдірді.

Ақерке БЕКҚҰЛОВА,

«Һибатулла Тарази» мешітінің баспасөз қызметі.

Мойынқұм ауданы

Байзақ ауданы

Жамбыл ауданы