Елімізде әр адам қалаған дінін ұстануға ерікті. Алайда соңғы жылдары шетелден түрлі діни ағымдарды уағыздайтын миссионерлердің ағылып келіп жатқаны ақиқат. Олар іс-әрекетін кеңейтіп, қатарына жастарды тартуда.

Қоғамда алаңдаушылық тудырып жүрген бұл жайттың жауынгерлер арасында таралуының алдын алу мақса­тын­да Т.Рысқұлов аудандық әскери бөлім сарбаздары мен  «Жауынгерлер діни экстремизм мен терроризмге қар­сы» тақы­рыбында кездесу өтті.

   Кездесу барысында сөз алған аудандық «Сұлтан »мешіттің бас имамы Сұлтаншәріп қажы  Джадраев елдегі дәстүрлі ислам дінінің төрт мәз­хабы хақында, теріс бағыттағы кей топ­тардың іс-әрекеттері, имандылық пен ізгілік, жақсылық пен жамандық туралы түсінікті де ұғынықты етіп айтып берді. Кей күмәнді ағымдардың арбауына түскен жастардың ата-аналарына қарсы шығып, тәрбиеге бағынбайтындығы, сөйтіп, ғасырлар бойы ұрпақтан ұр­пақ­қа жалғасып келе жатқан әке мен бала, ана мен қыз арасындағы өзара сыйлас­тықтың бұзыла бастағаны туралы нақты мысалдар келтіре әңгімеледі.

«Қазір имандылық жолын ұстаған­дардың арасында Отан қорғауға шақы­ру үшін медициналық тексеруден өту­ден бас тартатындар да кездеседі. Біздің еліміз – зайырлы құқықтық мемлекет. Ата Заңға сәйкес діни нанымы бойынша Отан қорғаудан бас тартуға, елдің мемлекеттік рәміздерін құрметтемеуге құқы жоқ. Осы жағына баса назар аударып, есте ұстау қажет», – деп мәселенің заңдылық жақтарына да түсінік берілді.