Қазақстан мұсылмандары діни бақармасының төрағасы, Бас мүфти Ержан қажы Малғажыұлы хазреттің имамдар алдына қойған міндеттерінің бірі халықты діни сауаттандыру, жастарды жат ағымның жетегінен сақтау болатын. Осыған орай, ҚМДБ-ның жанынан құрылған РАНТ-ның республикалық ақпараттық насихат тобының мүшесі ОҚО-ның найб имамы Еркебұлан Қарақұлов Тараз шаһарына ат басын тіреді. 11-15 сәуір аралығындағы Жамбыл облысының қала, аудандарын аралап уағыз-насихат жүргізген өкілдер ақида, төл ата дініміз, адамгершілік, діни сауаттылық турасында халықпен пікірлесті.

Жамбыл облысы бойынша жүргізілген үгіт-насихат жұмысы бірінші болып М.Х.Дулати атындағы ТарМУ-да ҚМДБ-ның Жамбыл облысы бойынша өкілі Данияр қажы Жұмабаев пен Еркебұлан Қарақұловтың қатысуымен өтті. Еркебұлан Қарақұлов пен «Һибатулла Тарази» мешітінің найб имамы Ержан Аманбаев ТарМУ-да «Тарих және әлеуметтік педагогика» факультеті, «Бизнес және есеп» колледж, «Һибатулла Тарази» мешіті, «Байдібек» мешіті, Құлан ауылы (ҚАШК) Құлан ауылшаруашылық колледжі, «Сұлтан» мешіті, Кәсіптік колледж, «Хан» мешіті, Аудандық «Нұр Отан» партиясы ғимаратының мәжіліс залы, Бірлік ауылдық «Бірлік» мешіті, «Жәми» мешіті, Гуманитарлық-экономикалық колледжі, «Қордай» мешіті, Қасық ауылдық «Құдайберген» мешітінде кездесу өткізді. Жиынға жалпы 1,347 адам қатысты.

Жамағат көкейлеріндегі сауалдарын қойып, дәлелді әрі мардымды жауаптар алды.

Ақерке БЕКҚҰЛОВА,

«Һибатулла Тарази» мешітінің баспасөз қызметі 

Шу қаласы

ҚМДБ-ның жанынан құрылған РАНТ-ның республикалық ақпараттық насихат тобының мүшесі ОҚО-ның найб имамы Еркебұлан Қарақұлов  және облыстық «Һибатулла Тарази» мешітінің найб имамы Ержан Аманбаев іс-сапармен Шу қаласындағы қалалық «Жәми» мешітінің жамағатымен түскі бесін намазынан соң уағыз айтты. Жиналған жамағатқа айтылған уағыз өте қызықты және тартымды болғандықтан көпшіліктің сұрауы бойынша, кешкі құптан намазына қатысып  2 сағаттай уағыз жүргізді.

Еркебұлан қажы Аллаға мадақ, Пайғамбарға (с.ғ.с.) салауат айтып,  ең әуелі Алланың жібінен жармасуға шақырып, Ислам ауызбірлік, ынтымақ, басшыға бағыну екендігін айтып, Алланың кітабы Құраннан, Пайғамбарымыз (с.ғ.с) хадистерінен көптеген мысалдармен  келтіре отыра уағыз  айтты. Әсіресе, ақидаға байланысты жамағатқа көптеген мәселелерді қозғап, ең бастысы ақидаң дұрыс болса адаспайтынын түсіндіріп, жамағаттың қойған бірнеше сұрақтарына жауаптар берді. Сөз соңында «бақ қайда барасың дегенде, ынтымақты елге барамын» деп айтқандай, ең бастысы ауыз бірлігі бекем  болса, ынтымағы жарасқан ел ғана озатынын айтты. Уағызға жиналған Шулық жамағат іс-сапармен келген Еркебұлан Қарақұловқа алғыстарын айтып, өз ризашылықтарын білдіріп, қариялар ақ-батасын берді.

Шу қалалық «Жәми» мешітінің баспасөз қызметі

Шу ауданы

         Сәрсенбінің сәтті күні РАНТ мүшелері Оңтүстік Қазақстан орталық мешітінің найб имамы Е.Қарақұлов «Һибатулла Тарази» мешітінің найб имамы Е.Аманбаев және Жамбыл облыстық дін істер комитетінің бас маманы Е.Есмаханов Шу аудандық «Нұр Отан» мәжіліс залында мекеме басшыларымен білім саласындағы мамандармен және ауыл ақсақалдарымен кездесу өткізді.

         Кездесу аудан аумағындағы діни ахуал, дін мәселесі жөнінде болып, ел ішінде өзара татуластық, адамгершілік, ізгілік және адамдар арасында тағы басқа шынайы қарым-қатынастарды орнатуға ықпал ету мақсатында болды.

         Сонымен қатар РАНТ мүшелері Шу қаласындағы «Алмаз» колледжінде студенттермен кездесу өткізіп, бесін намазында «Жәми» қалалық мешітінде ислам дініндегі кері тартпа ағымға қарсы кеңінен уағыз-насихат жүргізді.

         Уағызға жиналған жамағат келген қонақтарға айтылған уағыз-насихаттарына өз ризашылықтарын білдіріп алғыстарын айтты.

Шу ауданы Төле би мешітінің баспасөз қызметі

Меркі ауданы

Қазақстан мұсылмандары діни басқармасы жанынан құрылған Республикалық насихат-ақпараттық топ мүшесі Еркебұлан Қарақұлов, облыстық «Һибатулла Тарази» мешітінің найб имамы Ержан Аманбаев, Жамбыл облысы діни депортаментінің маманы Еркебұлан Есмаханов бесін намазының алдында орталық «Меркі-ата» мешітіне ат басын тіреп, бесін намазын жамағатпен оқыды.

Топ мүшелері мен аудан әкімінің ішкі саясат бөлімінің маманы Меліс Ракишев, ауданның бас имамы Батырбек Қасымалиев №9 колледждің студенттерімен кездесті. Кездесу барысында қадірлі қонағымыз Еркебұлан Нұрғалиұлы  жастармен ашық сұхбаттасып, алып жатқан ілімдері қайырлы, келешекте ел үшін қызмет жасап, үлкен белестерден көріну үшін мүмкіндігі барларға жоғарғы оқу орындарда жалғастыруларына ақыл-кеңес берді. Жиын соңында жастар өздерінің көкейде мазалап жүрген сұрақтарын қойып, жауап алды.

Екінші кездесу аудан орталығындағы «Қарабала Төре» мешітінде ауданға қарасты ауыл мешіттерінің имам-молдалары жамағаттарымен жүргізілді. РАНТ мүшелері Имам Ағзам Әбу Ханифаның өмір жолдарына тоқталып, дін жолындағы атқарған еңбектері жайлы әңгімеледі.

Аудандық «Меркі-ата» мешіті

Жамбыл ауданы

Қазақстан мұсылмандары діни басқармасының Республикалық үгіт-насихаттық тобының мүшесі Еркебұлан Қарақұлов пен «Һибатулла Тарази» мешітінің найб имамы Ержан Маханов Жамбыл ауданына қарасты ауыл мешіттерінің жамағатымен кездесті. Кездесу барысында халықтың бірлігі және «Масһабты ұстану» жайлы уағыз айтты. Кездесу соңында Қарақұлов Еркебұлан мешіт жамағатының көкейінде жүрген сұрақтарға жауап берді.

 Әмірбек ӘБДІРАЗАҚ,

 «Бәйдібек» мешітінің найб имамы

Т.Рұсқұлов ауданы