Қордай ауданы Арал елді мекенінде үлкен жақсылық орын алды. Әлемдердің Жаратушысы Алланың  қалауымен  Жаппар Иемізге  жақындататын киелі орын мешіт ашылды. Мешіт құрылысына ауыл болып, ел болып ат салысса, бас демеуші болып «Мұсылман жастар қауымдастығы» үлкен іс атқарылды.

Құлшылық ордасының ашылу салтанатына Қордай ауданының бас имамы Ж.Шалбаев, ауыл әкімі Ж.Спанов, «Мұсылман жастар қауымдастығы» мекемесінің өкілі Абдулхаким, ақсақалдар, ауыл тұрғындары қатысты. Аудан имамы Ж.Шалбаев барша жиылғандарды құттықтап, өз лебізін білдірді.

«Пайғамбарымыз (с.ғ.с) Алла үйін тұрғызған адам үшін жәннатта сарай салынатынын өсиет етіп, сүйіншілеген. Ендеше, жаңа мешіт имандылықтың темірқазығына айналсын.

«Құрметті бауырлар! Біздер қой үстіне бозторғай жұмыртқалаған бейбіт, тыныш заманда өмір сүріп отырмыз. Құлшылық жасауға барлық азамат құқылы. Құдайға құл, адамға ұл болуды, имандылықты ту етуді мақсат тұтуымыз керек,» – дей келе  мешіт құрылысы аяқталғанымен, құжаттары толық рәсімделмегеніне байланысты және  мешіт имамы тағайындалмағанына байланысты мешіт толыққанды жұмыс атқара алмайтынын айтып, құжаттары рәсімделіп жатқанын жеткізген имам қысқа уақытта мешіт  халыққа толыққанды қызмет атқаратынын жеткізді.

Бүгінгі күнгі салтанатты жиын бұл Аллаға шүкір ету дастарханы, мешіт құрылысына демеушілік еткен азаматтарға құрмет дастарханы екені мәлімделді. Жиын барысында бірнеше азаматтар сөз алып, жылы лебіздерін білдіріп жатты.

Жаңа мешіт ғимараты заман талабына сай салынған. Еден жүйесімен жылытылатын мешіт  дәріс беру бөлмесімен, дәрет алу бөлмелерімен толық жабдықталған. Халық игілігіне қызмет етуге толық дайын.

Қордай мешіті атынан жаңа мешітке Алла Тағала береке нұрын шашып, ауылдың дни сауатын арттырып, жастарын имандылыққа бет бұратын ілім ордасына айналдырсын деген ниетпен, Қайрат ауылы мешітінің ұжымына Ислам дінін таратудағы жолда сабырлық пен сәттілік тілейміз.

Аудандық «Қордай» мешітінің баспасөз қызметі