Жастар – ата-бабаларымыз салып кеткен дара жолдың мұрагері, кешегінің тұяғы, келешегіміздің тұтқалары. Тарихымыз сенім артқан иманды жастар – ұлт келбеті.

Қоғамдағы көпбалалы, жалғызбасты, әлеуметтік жағдайы төмен, көмекке мұқтаж адамдарға көмек көрсету мақсатында жалынды жастардан құрылған «Жүректен жүрекке» қайырымдылық қоры ардақты Пайғамбарымыз Мұхаммедтің (с.ғ.с.) туылған мүбәрак Мәуліт айына орай «Һибатулла Тарази» мешітінің ұйытқы болуымен қайырымдылық науқанын өткізді. Аталмыш іс-шара «Һибатулла Тарази» медресесінде өтті. Медресеге 6 отбасы шақыртылып, азық-түлік таратылды. Жәрдем көрсетілген отбасылар алғыстарын білдіріп, «Һибатулла Тарази» мешітінің найб имамы Ғалымбек Жапек қанатын жайған жас қорға қанат қағып, игілік шыңынан көрініңдер деп батасын беріп, қоғамның келбеті болған жастарға дұға тіледі. Көш бастап жүрген жетекшілерге қолдау көрсетіп, жастарды жігерлендірді.

«Жүректен жүрекке» қайырымдылық қорының құрылғанына небәрі 2 ай толса да, жақсылық жалауын желбіреткен жалынды жастар 20 отбасыға көмек қолын созып үлгерген. Алдарына үлкен мақсат пен талап қоя білген қор белсенділері халыққа мейірімділік сыйлауға әзір.

Ақерке БЕКҚҰЛОВА,

«Һибатулла Тарази» мешітінің баспасөз қызметі.