Шу қалалық «Жәми» мешітінің бас имамы жыл басынан бері қаладағы білім ордалары және мекемелерде әртүрлі тақырыптарда кездесулер өткізіп келді.

Соның бірі – Шу қаласындағы «Жібек жолы» мектеп-лицейінің 9 сынып оқушыларымен аталмыш тақырыпта өткен кездесу. Жиында «Жібек жолы» мектеп-лицейінің директоры, мұғалімдер және оқушылар қатысты.

Шу қаласының бас имамы Қуат қажы Дүйсенбайұлы: «Ең әуелі Аллаға шүкір етуіміз керек, өйткені, ата-бабаларымыз жет алмай аңсап, армандап кеткен тәуелсіз еліміздің топырағын басып жүрміз. Кезінде бабаларымыз армандаған өз тіліміз, дініміз, салт-дәстүріміз өзімізге оралып көңіліміз жайланған жайымыз бар. Қазіргі таңда Аллаға шүкір егемен елімізде дініміз көркейіп, жастарымыз дінге бет бұрып, ата-бабамыздың жолымен бес уақыт намазын оқып, Аллаға деген құлшылығын жасауда. Еліміздің болашағы жастарда екенін ұмытпайық. Сондықтан бірінші кезекте Жаратушы иеміз бұйырған «Оқы» бұйрығына құлақ асып, қазіргі сіздердің міндет білім алу, оқу екенін ұмытпайық,» – деді.

Оған қоса бас имам мектеп қабырғасынан бастап діни біліммен сусындау қажет екенін айтып, сол кезде ғана қазіргі қаптап кеткен тексіз секталардан, пиғылы бұзық діни ағымдардан өзімізді сақтай алатынымызды түсіндірді.

Сөз соңында бас имам еліміздің үкілеген үміті сіздерсіздер, сондықтан болашақ жастардың қолында, бар үміт сіздерде әр біріңіздің көзіңіз ашық болып «Нұрлы жолды өзге жолдан ажырата білсеңіздер» нұр үстіне нұр болмақ деп жеткізді.

Шу қалалық «Жәми» мешітінің баспасөз қызметі