2015 жылдың 23 қыркүйегінде Жамбыл ауданы Аса ауылының орталық спорт кешенінде барша мұсылманның қасиетті мейрамы Құрбан айт мерекесіне арналған іс-шаралар өтті. Аудандық «Бәйдібек» мешітінің ұйымдастыруымен өткен шараға аудан тұрғындары және ауданға қарасты мекеме басшылары қатысып, Жамбыл ауданы әкімінің орынбасары Үміткен Қапанқызы және аудандық «Бәйдібек» мешітінің бас имамы Ғайырфулла Қуанышбекұлы жиналған жұртшылықты мұсылмандардың ұлық мерекесі Құрбан айт мерекесімен құттықтады.

  Мерекеге орай аудандық мәдениет үйінің өнерпаздары имандылыққа тәрбиелейтін театрландырылған көріністерін көрсетсе, елімізге танымал айтыскер ақын Айтмұхаммед Исақов мерекеге арнауын жолдады.

Бұдан бөлек, аталмыш мерекеге орай аудан жастарының қатысумен футбол, қазақша күрес, арқан тартыс, қол күресі, асық ату және т.б. бұқаралық спорт түрлерінен жарыстар ұйымдастырылды. Жарыс қорытындысы бойынша жеңімпаздар естеліктермен, бағалы сыйлықтармен марапатталды.

Ә. ӘМІРБЕК,

«Бәйдібек» мешітінің найб имамы