Пионер ауылдық округі Қ. Сартбаев атындағы орта мектебінде Аса ауылы Бәйдібек мешітінің бас имамы Ғайырфулла Қуанышбекұлы және «Жаңа-Ру» жастар коалициясы заңды тұлғалар бірлестігінің президенті Серікбол Берікқожаның ұйытқы болуымен Құрбан айт мерекесінің тарихы, маңыздылығы мен атап өту ерекшеліктері жайында мектеп оқушылары мен мұғалімдердің қатысуымен кездесу өтті. Іс-шараға жалпы 120 адам қатысты. Аталмыш жиында Құрбан айт мейрамының барша мұсылмандар үшін мән-маңызы аса зор екендігі, өнегесі өзгеше екені тілге тиек болды. Ауқатты, тұрмысы жақсы адамдар Ұлы Жаратушы Иеміз Алла разылығы үшін құрбандық шалып, кедей әрі мұқтаж адамдарға, міскін жандарға қамқорлық көрсету керектігі айтылды.

Имам Алладан ізгі тілектер тілеп, бақилық болған ата-бабаларының, жақындарының рухына Құран бағыштап, берекесі мол дастархан жайып, туыстармен, мұсылман жұртшылығымен бұл ұлық мерекені атап өтудің ерекшелігіне тоқталды. Сонымен қатар, Құрбан айт мерекесі құтты болсын дей отырып, осы ұлық мейрамның қарсаңында оның мән-маңызы жайлы айтып өтті. Табалдырығымызды аттағалы отырған Құрбан айт мерекесімен барша мұсылман қауымын шын жүректен құттықтап: «Жаратқан Иеміз құлшылықтарыңызды қабыл етіп, мақсат-мұраттарыңызды асыл еткей!» – деп жылы лебізін білдірді.

Ж.Тоқсаба,

 «Жастар ресурстық орталығы» КММ-ның директорының орынбасары