Алдында хабарлағанымыздай «Һибатулла Тарази» мешітінде Қазақстан мұсылмандары діндер басқармасының ғұламалар кеңесінің мүшесі, республикалық уағыз-насихат тобының мүшесі, теолог-исламтанушы ғалым, ұлағатты ұстаз Ерсін Әміремен кездесу өтті. Екінті намазынан кейін алыстан ат артып келген ұстаздың уағыз-насихатын тыңдауға жиналған ықыласты халық құлаққа ұрғандай тып-тыныш рухани азық жинаған-ды.

Жүрекке шаншудай қадалар, ұстарадай өткір айтылған уағыз жамағаттың жүрегін елжіретпей қоймады. Аллаға деген махаббат, сүйіспеншілік сынды тақырыптарда сөз қозғалып, Құран мен хадистен дәйектер келтірілді.

Алла Тағала құлдарын шексіз сүйетіні соншалық, қабір әлемінде барлығын жәннәт бақшасында болуды қалайды. Сол жерде өзімен қауышуға шақырады. Тіпті оған баратын жолды да көрсетіп қойды құлдарына. Ал қабір азабына ұшырап, тозаққа апаратын харам жолды осы дүниеде жапты, одан аулақ болуға әмір етті. Әрбір жаратылысқа өзіне лайықты міндет жүктей отырып, барлық құлдарына өзіне тиесілі несібесін бұйыртты. Ол несібені тек халал жолдармен табуды ескертті. Өз құлдарына деген мейірімінен ешкімді кенде қалдырмайтын Раббымызға деген махаббаттың дәрежесі тілге тиек етілді.

Ет асым уақытта жүрекке маздап жанар рух берген адуынды сөздер жүректің мерейін өсірген-ді. Алла үйіне жиналған жұрт теолог-исламтанушы ғалымға көкейкесті сауалдарын қойып, көңіл көншірлік жауаптарын алды.

 Ақерке БЕКҚҰЛОВА,

«Һибатулла Тарази» мешітінің баспасөз қызметі.