ҚМДБ-ның төрағасы, Бас мүфти Ержан қажы Малғажыұылының бастамасымен қолға алынған игілікті шараның негізгі мақсаты – жазғы демалыс мезгіліндегі балалар мен жасөспірімдердің уақытын тиімді пайдалану, оларды діни сауаттылыққа бағыттап, имандылықтың іргетасын қалыптастырып, жас ұрпақты имандылыққа тәрбиелеу болып табылады.

Тараз қаласы, Самал (7) мөлтек ауданында орналасқан «Әзрет Әли» мешітінде жылдағы дәстүр бойынша осыдан 2 ай бұрын жазғы Құран үйрену курсы өз жұмысын бастаған болатын. Міне, аталмыш шара мәресіне де жетті.

Сонымен жазғы Құран үйрену курсының екінші легінің дәрістері аяқталды. Қорытынды дәріс ретінде ұйымдастырылған сайыс-сабақта балалар екі топқа бөлініп, «Мекке» және «Мәдина» деп топтарына атау қойып, өзара сынға түсті. Жарыс барысында шәкірттер 1 ай алған білімдерін көрсетіп, Құран оқып, ислами сұрақтарға жауап берді. Өте қызықты өткен сабақ соңында әділ қазы мүшесі болған «Әзрет Әли» мешітінің азаншысы Асқар мырза сөз сөйлеп, шәкірттерге өз батасын берді.

Маусым-шілде айларында ұйымдастырылған ілім курсында ер балаларға арналып дәріс өтілді. Сабақ барысында балдырғандарға Құран әліппесі, имандылық сабақтары, арабша үйрену секілді тәлімі мол дәрістер үйретілді. Құран үйрену курсының еліміздің болашағы балалар үшін берер пайдасы да зор екені түсінікті. Құран үйренуші шәкірттердің саны жыл сайын артпаса, кеміген емес.

Орынбасаров Жалғас

«Нұр-Мүбарак» Египет ислам мәдениеті

университетінің 2 курс студенті