Биыл да жылда қалыптасқан дәстүр бойынша аудандық «Қордай» мешітіндегі ораза айт намазына халық көп жиналды. Олардың арасында ақсақалдар, әже-апалар, орта буын ағалары, әртүрлі сала қызметкерлері жастардың қатары да мол болды. Айт күндері мейірім-шапағат, рақымшылық, достық сезімдерін тудыратын уақыт. Айт күндері адамдардың рухы шаттанады, күнделікті күйбең тіршіліктен жабырқау тартқан көңілдері жадырап, бір сергіп қалады. Мұнда бас қосқан мұсылман қауымның алдында аудан бас имамы Ә. Шалбай сөз сөйлеп, Ораза айтының өзіндік ерекшелігіне кеңінен тоқталды. Уағыз айтып, жұртшылықтың көкейінде жүрген мәселелер жөнінде де ойын ортаға салды. Қадірлі мерекеге арнайы келген аудан әкімі Қайрат Досаев барша жиналған жерлестерімізді қасиетті ораза айт мерекесімен шын жүректен құттықтады. Әрбір отбасына шадыман-шаттық, ырыс-береке тіледі.

 Бұл күні айт мерекесіне орай аудан орталығында қатынайтын қоғамдық көліктер аудандық «Қордай» мешітінің ұйымдастыруымен айт күнінің құрметіне жолаушыларды тегін тасыды. Облыстық «Һибатулла Тарази» мешітінің ұйымдастырыуымен Қордай-Тараз қоғамдық көлігінде де ұлық мерекеге орай жол жүру ақысы тегін болды. Ә. Шалбай жолаушыларды айт мерекесімен құттықтап, ізгі тілектерін айтып, дұға жасады.

Аудандық «Қордай» мешітінің баспасөз қызметі