«Әрбір қиыншылықтың артында бір жақсылық бар» – демекші, сол жақсылық атаулысы Мойынқұм ауданында орнады. Осыған дейін жамағат аймақтағы мешіттің кіші үйінде намаз оқып, жұма намазында Алладан тілеген дұғалары қабыл болды. Нәтижесінде күрделі жөндеуден өткен Мойынқұм аудандық мешітінің ашылу салтанаты өтті.

Аталмыш жиынды облыстық «Һибатулла Тарази» мешітінің наиб имамы Ж. Ғалымбек қасиетті Құран сүрелерімен ашып, аталмыш орталық мешітінің атынан қағба бейнеленген суретті тарту етті. «Қалқаман екі» мешітінің бас имамы С. Мейірманов ізгі ниетпен құттықтау айтып, мешітке Құран кітабын сыйға берді.
Сондай-ақ, аудан әкімі Бақытжан Нүркенов Алла үйінің ашылуымен құттықтап, ізгі тілегін білдірді.

Мешіт жамағатынан Ж. Қалыбаев, Ш. Әміреқұлов, З. Әлімбетов сынды ақсақалдар да тілектерін айтып, ақ батасын берді. Бой көтерген мешіттің бас имамы Зият Исаев аудан тұрғындарына, мекемелерге, кәсіпкерлерге демеушілік еткендеріне алғысын айтып, ризашылығын білдірді. Жиын соңында мешіттің құрылысы жайында есеп беріліп, «Бақ сарайы» мейрамханасында жамағатқа ас берілді.

Ә. Сүиіндік