Жамбыл облысы орталық «Һибатулла-Тарази» мешіті жанынан ашылған қыздар сауат ашу курсының ұстаздары мен шәкірттерінің ұйымдастыруымен ақ дастархан жайылып, «Асыл аналар» атты концерттік кеш өтті. Әйелдер арасында өткізілген іс-шараның қонағы болған қала тұрғындарының қарасы әйелдер намазханасын нық толтырды.

Аталмыш жиын Құран оқумен басталып, түрлі ғибратты көріністермен жалғасын тапты. Ұстаздар уағыз айтып, қызықты ойындар ойнатып, шағын сыйлықтар жасалды. Медресе шәкірттері аналарға байланысты хадистер мен қазақ мақал-мәтелдерін тілге тиек етіп, ардақты пайғамбарымызға (с.а.у) салауат атты. Ислам діні келіп, тарай бастағандағы алғашқы мұсылмандардың өмірінен үзінділер ұсынылып, алғаш шаһид болған әйел Сумайя анамыз жайында, Құранға айналған асыл аналарымыз жайында көріністер көрсетіліп, жиналған жұрт жасына ерік берді. Қыздардың өз арасында, үйде сондай-ақ, сыртта киюге арналған киім және орамал үлгілері көрсетілді.

Бас қосуды үлкен дайындықпен атқарған шәкірттер келушілерге үлгі бола білді. Айтулы отырысқа разылығын айтып әжелеріміз бата беріп, алғысын білдірген қонақтар үлкен қуанышпен тарасты.

Жамбыл облыстық «Һибаулла-Тарази» мешітінің баспасөз қызметі