Міне бүгін, күллі мұсылман жұртшылығы атап өтетін мәулід мерекесі киелі Қордай жеріне де жетті. Мәулід мерекесіне мешіт қызметкерлері мен мешіт жамағаты жылдағыдай бар ынта жігерімен, жан тәнімен ат салысып дайындалып, бүгінгі күні соның жемісін көруде.

Дайындық барысын атап айтсақ, ең әуелі екі жұма қатарынан жұма уағыздарында мәулід мерекесінің маңызы жайлы және ардақты елші Мұхаммед (с.ғ.с) өмірі жайлы мешіт имамдары уағыздар айтты. Мәулід мерекесінің маңызы мен Пайғамбарымыздың өмірі жайлы аудандық «Қордай шамшырағы» және «Кордайский маяк» газеттерінің 11-12 нөмірлерінде аудан бас имамы Ә.Шалбайдың «Мәулід мерекесі» атты кең көлемді мақаласы жарық көрді. Ауылдық округ әкімдерімен келісе отырып және ауылдық имамдарға тапсырма беріліп әр ауылдан 15 қонақ шақырылды.

Аталмыш іс-шаралар өз нәтижесін беріп, аудандық Мәдениет үйіне белгіленген уақытта халық ағылып, зал тола бастады. Мерекелік іс-шара қасиетті Құран аяттарының оқылуымен басталды. Қордай ауданы әкімінің орынбасары Қуат Рашханұлы Иманалиев жиналған жамағатты, мәулід мерекесімен құттықтап, мәулід мерекесінің маңызы жайлы сөз қозғады. Келесі сөз кезегі ауданымыздың маслихат хатшысы Біржан Әбдікерімұлы Әлімбет жиналған жамағатты мәулітпен құттықтап, жылы лебіздерін білдірді.

Мерекелік бағдарламаның арнайы қонағы болған Тараз қалалық «Әулие ата» мешітінің бас имамы Аят Дыбысұлына беріліп, өз сөзінде ардақты елші Мұхаммед (с.ғ.с) дара тұлғасы мен сара жолы жайлы әсерлі уағыз айтып, облысымыздың өқіл имамы Данияр Әлимұхамедұлы Жұмабаев мырзаның сәлемдемесін жолдады. Бас имам Әбдужалил Шалбай жамағатты мәулід мерекесімен құттықтап, өз тілектерін жеткізді. Мерекелік сахнаға арнайы шақырылған «Асыл мұра» өнер орталығының жасампаздары шығып, өз өнерлерін көрсетіп, халық ризалығына қауышты. Атап айтсақ «Сараң мен Жомарт» көрінісі халық ілтипатына ерекше бөленді. Мерекені тамашалауға келген халық өз разылығын ұйымдастырушыларға, демеушілерге білдіріп, ақ батасын беріп жатты. Міне, осындай керемет жағдайда Қордай ауданы мәулід мерекесін атап өтті.

Аудандық «Қордай» мешітінің
баспасөз қызметі