Алла тағала пайғамбарымыз Мұхаммед (с.ғ.с.) ға ең алғаш жіберген уахиі оқу білім турасында екені қасиетті Құранның Ғалақ сүресінің алғашқы аятында айтылған. Ислам діні әруақытта адам баласын оқып-білуге, білмегенді үйренуге шақыруда. Биылғы жылы мектеп жасындағы оқушылардың жазғы демалыстарын ұтымды пайдалану мақсатында маусым айының 1-ші жұлдызынан бастап сауат ашу курсы өз жұмысын бастады. Пайғамбарымыздың (с.ғ.с.) хадисінде «Сендердің ең жақсыларың Құранды үйреніп және оны өзгеге үйреткендерің» деген хадисіне амал етілуде.

Оған қоса маусым айының 1-нен бастап қалалық «Айтқұл баба» мешітінің жанынан 30 балаға бір ай бойы демеушілер көмегімен лагерь ұйымдастырылып, өз жұмысын бастады. Лагерьде «Айтқұл баба» мешітінің молдасы Нұрлыханов Бақыт және «Һибатулла Тарази» медресесінен арнайы жіберілген шәкірт дәріс жүргізуде. Мұнда балалар жатын орын, үш мезгіл тамақпен қамтамасыз етілген.

1-ші маусым балалар күніне лагерьге жиналған балаларды орталық саябаққа, стадионға  апарып, әртүрлі ойындар ойнатып, балмұздақ жегізіп қыдыртып қайтты.