Біз өмір сүріп жатқан жаһандану заманы – тек технология мен экономиканың емес, түрлі идеологиялар мен діни ағымдардың да еш тосқауылсыз шарпысып жатқан кезеңі. Бүгінде ақпараттық кеңістіктің ашықтығы, әсіресе интернет пен әлеуметтік желілердің қарқынды дамуы діни танымды кеңейтуге мүмкіндік бергенімен, екінші жағынан, діни сауаты толық толыспаған жастарды торға түсірудің оңтайлы құралына айналды. Осы тұста бабалар салған сара жолдан адасып, жат ағымның жетегінде кеткендердің «жат ағым жарға жығады» деген ащы шындықтың құрбаны болып жатқаны – бүгінгі қоғамның ең үлкен қасіреті.

Ұлттық болмысымыз бен дәстүрлі дініміз – ғасырлар бойы қазақ даласында ішкі тұрақтылық пен бірліктің кепілі болып келді. Алайда, сырттан келген, біздің мәдениетімізге, тарихымыз бен салт-санамызға мүлдем жат радикалды ағымдардың басты мақсаты – халықты іштей іріту, ұлттық құндылықтарды мансұқ ету. Салт-дәстүрді бидғатқа (дінге енген жаңалық) балап, ата-ананы тыңдамауға шақыру, мемлекеттік заңдар мен рәміздерді мойындамау – дәл осы жат ағымдардың басты белгісі.

Алла Тағала қасиетті Құранның «Әл-Имран» сүресі, 103-аятында былай деп бұйырған:

«Бәріңіз Алланың жібіне (дініне) мықтап жабысыңдар және бөлінбеңдер!»

Бұл аят – мұсылман қауымын ынтымаққа, бірлікке және бөлінбеуге шақырады. Ал қоғамды ірітіп, мұсылмандар арасына іріткі салу – шариғат құптамайтын үлкен күнә. Ардақты Пайғамбарымыз (оған Алланың салауаты мен сәлемі болсын) өзінің хадисінде: «Көпшілікпен бірге болыңдар, бөлінуден сақтаныңдар», – деп ескерткен. Жат ағымдардың жетегінде кеткендер, ең алдымен, осы ұлы әмірлерге қарсы шығып, өзін қоғамнан, туған елінен, тіпті өз отбасынан оқшаулай бастайды.

Діни радикализм мен экстремизмнің шегі – әрқашан үлкен трагедияға алып келеді. Оған тарих та, бүгінгі әлемдік геосаяси жағдайлар да дәлел. Жақындарынан безіп, Сирия секілді қақтығыс аймақтарына аттанған, соның салдарынан отбасы ойран болып, балалары жетім қалған отандастарымыздың тағдыры – жат идеологияның қаншалықты қауіпті екенін көрсетті. Мұның бәрі – діни сауатсыздықтың және дінді соқыр сеніммен, фанатизммен қабылдаудың салдары.

Қорыта айтқанда, дін – адамды көркем мінез бен ізгілікке тәрбиелейтін құрал болуы тиіс. Ол елді бөлуге емес, біріктіруге қызмет етуі керек. Ата-бабамыз ұстанған салиқалы жолдан айнымай, ұлттық шежіреміз бен иман нұрын ұштастыра білгенде ғана біз кез келген сыртқы идеологиялық қауіпке төтеп бере аламыз. Артымызға ерген жастардың адаспай, тура жолда жүруі – бүгінгі исі мұсылманның, әрбір ата-ананың және дін қызметкерлерінің ортақ азаматтық әрі рухани міндеті.

Ержан Көшкімбай,

Мойынқұм ауданының бас имамы