Меркі ауданы, Қызылқыстақ ауылы “Әл - Карим” мешітінің асханасында ұйымдастырылған ауызашар дастарханында мешіт имамы Алпысбаев Есболдың және ауыл тұрғындарының бастамасымен ауылдағы әжелер мен аналарға құрмет көрсетіліп, ақ орамал жабылды.

Қазақта “Орамал тоң болмайды, жол болады” - деген сөз бар. Бұл орамалды сыйлаудағы мақсат үлкенге құрмет көрсету, арадағы сыйластық пен ауызбіршілікті арттыру.

Ақ жаулықты аналарымыз осы іс-жиынды ұйымдастырған жандарға ризашылығын білдіріп, рақметтерін айтып дән риза болып, ақ баталарын берді.

Ардақты Пайғамбарымызға ( Оған Алланың игілігі мен сәлемі болсын ) бір адам келіп: «Уа, Алланың Елшісі, кімге жақсылық жасайын?», – деп сұрайды. Пайғамбарымыз: «Анаңа», – деп жауап береді. Әлгі адам екінші рет: «Одан кейін кімге жасайын?», – дегенде, – «Анаңа» деген жауап алады. Әлгі адам тағы: «Одан кейін кімге жақсылық жасайын?», – дегенде Пайғамбарымыз үшінші ретте де «Анаңа», – деп жауап береді. Тек төртінші рет тағы да «Одан кейін кімге?», – деп қайталағанда, Пайғамбарымыз: «Әкеңе», – дейді.

Бұл хадис Исламда ананың мәртебесі үш есеге жоғары екенін көркем түрде жеткізген.
Ана болу – әйел адамның бақыты. Ананың жауапкершілігі де қиындығы да көп. Сондықтан, Алла Тағала анаға сондай мол сауап береді.

Меркі аудандық «Меркі ата» мешітінің баспасөз қызметі