Рамазан айы – мұсылман қауымы үшін ең қасиетті, ең берекелі айлардың бірі. Бұл ай – рухани тазару, сабыр мен шүкіршілік, кешірім мен мейірім айы. Құран Кәрім осы айда түсіріле бастағаны үшін Рамазанның қадірі тіпті арта түседі.

      Рамазанның ерекшелігі

Рамазан – һижра күнтізбесінің тоғызыншы айы. Бұл айда мұсылмандар таң сәріден күн батқанға дейін ораза ұстайды. Ораза – ішіп-жеуден, нәпсі қалауларынан тыйылу ғана емес, тіл мен көзді, жүректі жамандықтан сақтау.

Қасиетті кітапта:

«Рамазан айы – адамдарға тура жол көрсетуші, ақ пен қараны айыратын Құран түсірілген ай» (Бақара сүресі, 185-аят)

деп айтылған.

      Оразаның рухани тәрбиесі

Ораза адамға сабырлықты, тақуалықты, төзімділікті үйретеді. Аштық пен шөлді сезіну арқылы адам жоқ-жітікке жанашыр болады, шүкіршілігі артады.

Пайғамбарымыз Мұхаммед пайғамбар (с.ғ.с.):

«Кімде-кім Рамазан оразасын иманмен және сауап үмітімен ұстаса, өткен күнәлары кешіріледі»

– деп сүйіншілеген.

       Қадір түні – мың айдан қайырлы түн

Рамазан айының ең қасиетті түні – Қадір түні. Бұл түн мың айдан да қайырлы. Бұл түні жасалған құлшылықтың сауабы еселеп жазылады. Сондықтан мұсылмандар бұл түнді ғибадатпен, дұғамен, истиғфармен өткізеді.

      Рамазан – қайырымдылық айы

Бұл айда садақа беру, ауызашар ұйымдастыру, мұқтаждарға көмек көрсету – үлкен сауапты іс. Ағайын-туыс, көрші-қолаңмен қарым-қатынасты жақсартып, реніштерді кешіру – Рамазан әдебінің бір бөлігі.

       Рамазан – тек ораза айы ғана емес, жүректі тазартатын, иманды күшейтетін, адамды сабыр мен мейірімге тәрбиелейтін рухани мектеп. Әрбір мұсылман бұл айды мүмкіндігінше пайдалы өткізіп, құлшылығын арттыруға тырысуы керек.

 Құрметті бауырлар. Алла Тағала баршамыздың ұстаған оразамызды, жасаған дұға-тілектерімізді қабыл етсін!

 Ержан Аманбаев

Тараз қалалық орталық «Әулие ата» бас имамы