Аманат – өз алдына дара тұрған асыл қасиеттердің бірі. Мүмін адам өзіне тапсырылған аманатты сақтауға бар күш-жігерін жұмсайды. Оның имандылығы да осы сипатымен бағаланады. Қасиетті Құранда: «Олар – аманаттарын және уәделерін қорғаушылар» деп айтылған. Бұл аяттың тәпсірінде: «Аманат пен келісім адамның діни әрі дүниелік істерін түгел қамтиды. Ол сөзге де, іс-әрекетке де қатысты. Бұл ұғымдар адамдар арасындағы қарым-қатынаста кеңінен қолданылады.

Аманаттың мақсаты – оны сақтау және толық орындау», – деп түсіндірілген. Осы орайда Қордай ауданы, Қарасу ауылындағы «Яссауи» мешітінің имамы Идыбо Харсан және Еңбек ауылындағы «Еңбек» мешітінің имамы Абитаев Адамбек жамағатқа «Аманатқа берік бол» тақырыбында уағыз-насихат айтты. Насихат барысында аманатқа адал болудың маңыздылығы, мұсылманның жауапкершілігі және қоғамдағы сенімділікті сақтау жайында кеңінен түсіндірілді. Алла Тағала баршамызға аманатқа берік болуды нәсіп етсін!

Аудандық «Қордай» мешітінің баспасөз қызметі