Меркі ауданы, Қостоған ауылының «Ботбай баба» мешітінің имамы Омаралиев Қуанышбайдың ұйымдастыруымен мешіт асханасында ай сайынғы дастархан жайылды.

Ақ дастархан басына Меркі ауданына қарасты барлық мешіт қызметкерлері мен жамағаты, сондай-ақ елімізге белгілі дін қызметкері, ұстаз, «Әскер ата» мешітінің бас имамы Жанболат Сапашев шақырылды.

Игілікті шара барысында Жанболат ұстаз «Дұғаның қабыл болмау себептері және Алладан қорқу» тақырыбында уағыз-насихат айтып, жиналған халықты рухани азыққа бөледі. Рухани нәр алған ауыл жамағаты ұстаздарға өз алғыстарын білдіріп, Жанболат ұстаз бен ауданның бас имамы Азамат Берікұлының иығына шапан жапты.

Ауданның бас имамы Азамат Берікұлы ақ дастарханға жиналған жамағатқа уағыз-насихат айтып, бұл айлық дастарханды ұйымдастырған ауыл имамы мен мешіт жамағатына алғысын білдіріп, ауыл имамын мақтау қағазымен марапаттады.

Жиын соңында еліміз бен жерімізге дұға жасалды. Алла Тағала Қостоған ауылы тұрғындарының ниеттерін қабыл етіп, сауаптан жазып, отбасыларына амандық, дендеріне саулық, кәсіптеріне береке берсін!

Меркі аудандық «Меркі ата» мешітінің баспасөз қызметі