Жамбыл облысы Байзақ ауданының бас имамы Қанат Жұмағұл Жаңатұрмыс ауылдық округінің әкімдік қызметкерлерімен кездесіп, «Ізгі қоғам ауызбіршіліктің белгісі» тақырыбында дәріс оқыды.

Қанат Әділханұлы өз сөзінде: «Адам баласы өмір сүру барысында ізгі мақсаттарға жету үшін үнемі ізденісте және әрекетте болады. Әр адамның діттеген арманына жету үшін қолғабыс болатын ең құнды дүние ол – ауызбіршілік. Егер шаңырақта, халық арасында бірлік пен татулық болса, ел өркендеп дамиды және гүлденеді. Мұндай істерді бейнелейтін қасиетті құндылықтарымыз бар. Олар: ұлттық дәстүрлеріміз бен әдет-ғұрыптарымыз, бейбітшілікке насихаттаушы дініміз. Бірлік орнаған елде тыныштық салтанат құрып, жас буын қауіпсіз әрі еркін өседі. Нәтижеде қоғамда жан-жақты даму жүзеге асады. Демек, әлемдегі өмірдің тұрақты болуы, халықтың діни ғибадаттарын өз деңгейінде орындауы үшін ауызбіршілік пен татулық басты назарда болады. Алла Тағала Бақара сүресінің 208-аятында: «Уа, иман келтіргендер! Барлығың Аллаға қалтқысыз мойынсұнып, татулық пен бейбітшілікте өмір сүріңдер. Шайтанның басқан ізімен жүруші болмаңдар. Шүбәсіз, ол сендерге анық дұшпан» - деп, татулық пен бірлікті сақтау және қадіріне жету міндетін адам баласына жүктеген, – деді.

«Байзақ» ауданы мешітінің баспасөз қызметі