Меркі ауданы, Сұрат ауылдық округі, Тескентоған ауылында жаңа мешіттің қазығы қағылды. Іс-шараға Меркі ауданының бас имамы Азамат Берікұлы мен ауыл ақсақалдары мен тұрғындары қатысты.

Тескентоған ауылында 100-ге жуық шаңырақ орналасқан.  Жергілікті халық Алла Тағалаға құлшылық жасау үшін жақын ауылдарда орналасқан мешіттерге баруға мәжбүр. Өйткені ауыл маңында бұрын соңды мешіт соғылмаған. Жергілікті халық өз арасында қаражат жинап, ауыл тұрғындарын жақсылыққа шақырып, жамандықтан тыятын, Алла Тағалаға құлшылық жасалатын мешіт салуды ұйғарған.

Меркі ауданы бас имамы Азамат Берікұлы арнайы ауылға барып, ақсақалдармен кездесіп, жаңа мешіттің орнын бекітті. Ауыл ақсақалдары осындай игі шараға аудан имамының аранйы қатысқанына ризашылықтарын білдірді.

Алла қаласа ауылдарымызда азан айтылып, жұртымызға жақсылықты насихаттауға мүмкіндік алып жатыр. Алла үйінің ашылуына тез арада қауышу үшін Жаратқаннан нығмет тілеп, игі іске атсалысып, әрбір мұсылман баласын көмек қолын созуға шақырамыз.

Осындай игі іске қол ұшын созып жатқан жомарт жандарға ізгі ниетімізбен алғысымызды білдіреміз. Алла Тағала қызметтерінде абырой-бедел берсін. Демеушілік жасап жатқан кәсіпкер бауырларымызға Алла разы болсын дейміз.

Меркі аудандық «Меркі ата» мешітінің баспасөз қызметі