«OnIslam.net ресми ақпарат айдынына шыққалы ауқымды жұмыс жүргізді. Аллаға сансыз шүкірліктер болсын. Алғашқыда шектеулі мүмкіндіктер шегінде жарыққа шыққан портал уақыт өте өз биігіне көтерілді. Өз аудиториясын қалыптастырды. Алла тағала бізге күш-қуат берді» дейді веб-сайттың Reading Islam бөлімінің редакторы Тарик Иззат.

OnIslam.net порталын ашу туралы бастама осыдан 5 жыл бұрын ағылшын тілінде ислам тақырыбында әлемдік деңгейде тұщымды хабар таратушы халықаралық БАҚ орталығы қалыптаспай тұрғанда пайда болған. Портал осы уақыт аралығында жаңалықтар қызметімен қатар көлемді пәтуа базасы бен талдау материалдары қорын жиып үлгерді. Алдағы уақытта OnIslam.net барынша тиімді навигацияларды іске қосып, жаңа дизайнға көшірілмек.

Айта кету керек, бүгін де OnIslam.net порталының ағылшын тілінен аударылған жаңалықтары мен талдау мақалалары көптеген веб-ресурстарға дерек көз ретінде пайдаланылады. Өз кезегінде аталмыш портал лентасын назарда ұстайтын E-islam.kz ұжымы да әріптес сайтқа шығармашылық өрлеу мен кәсіби жетістікке жетуді тілейді.