«Есентай молл» сауда үйіндегі «KinoPark 11» кинотеатры, comfort VIP залында  «Асыл арнаның» төл туындысы «МҰНАРАЛЫ ЕУРОПА: қос аралдағы құлшылық» деректі фильмінің арнайы көрсетілімі өтті.

Бұл – осыдан бір жыл бұрын Еуропа жерінде түсірілген ауқымды жобаның жалғасы. 2014 жылы «Асыл арнаның» түсіру тобы қасиетті Рамазан айында Батыс Еуропаға жол тартқан болатын. Көпшілігімізге бейтаныс әлемнің ислами келбетімен таныспақ ниетте 8 мемлекетті, 6000 шақырым жолды 18 күнде көлікпен жүріп өтті.

Ал бұл жолғы деректі фильм Ұлыбританияның Лондон, Оксфорд, Кембридж сынды ең танымал қалаларындағы, Ирландия, Шотландия, Сомали жеріндегі мұсылмандар өмірін қамтиды. Атап айтар болсақ, Черчиль рұқсатымен салынған мешіт; Лондондағы жұма намаз; Құран тыңдататын ресторан; Ағылшындар сұранысында – адал ас; Мұсылманы мол Лутон қаласы; Англияда мешіт салған қазақ; Королеваның қабылдауында болған имам; Ханзада Чарльз мұсылман ба? Кардифф. Азаттық аңсаған валлиялықтар астанасы; Мешіттер тарихы, шіркеулердің мешітке айналуы; сынды қызықты тақырыптарды қамтиды. «Асыл арна» телеарнасы дәл осы ауқымды жобаның екінші бөлімін бүгін ел ағаларына, тілектес бауырларға көрсетті. Бір жарым сағатқа жуық деректі фильм лық толған залды өзіне баурап алды. Келген көпшілік арасында жас сәби де, қария да, жасөспірімдер мен ересектер де бар.

Сондай-ақ, көрсетілімге Сәкен Қалымов, Бекжан Тұрыс, Азамат Сатыбалды сынды өнер адамдары да келген болатын.

Қонақтар фильм соңында оң бағасын беріп, алған әсерлерімен бөлісті, «Асыл арна» телеарнасының ұжымына алғыс айтумен болды. Мәселен, актер Азамат Сатыбалды инстаграм желісіндегі парақшасына: «Асыл арна» ұжымы түсірген «МҰНАРАЛЫ ЕУРОПА» деректі фильмінің тұсау кесерінде болдым... Еуропаның бізге беймәлім, күнгей жағын, ислами тұрғыдан бізге жақсы жеткізіпті. Өте керемет түсірген, мағыналы әрі мәнді... Көруге кеңес беремін» деп жазады.

Ақ жаулықты аналарымыз бен ақсақалдарымыз  да ақ батасын беріп, жүрекке жеткен тұстарын атап өтіп, көздеріне жас алды.

«Асыл арна» ұжымы өз тарапынан шара соңында барлық келушілерге арнайы сыйлық үлестірді.

asylarna.kz