Жамбыл облысы Байзақ ауданы «Байзақ баба» мешітінің наиб имамы Мұхит Ермаханұлы Қосақ ауылдық «Қосақ» мешітінің жамағатына уағыз айтып, жұма намазын өткізді.

  Мұхит Ермаханұлы: «Адам баласының дәрежесі өзге жаратылыс атаулының бәрінен де жоғары әрі үстем. Сол себепті де, адам өз өмірін оп-оңай қия салатындай сұраусыз, іздеусіз, бостан-босқа жүрген мақсатсыз жаратылыс емес. Алла Тағала қасиетті Құранның «Исра» сүресі, 70-аятында: «Біз адам баласын ардақтадық ...», – деп айтып, адам баласының басқа жаратылыстардан әлдеқайда артық жаратылғандығын жеткізді. Сондықтан әрбір жанның өмірі өте қымбат. Оның өміріне қол сұғуға, ар-намысына тиюге, малына зұлымдық жасауға, еркінен айыруға дінімізде рұқсат жоқ. Тіпті, адам өмірінің қымбаттығы сонша – жазықсыз бір адамды өлтіру бүкіл адам баласын өлтірумен пара-пар», - деді.

Жұма намазынан кейін наиб имам жамағатпен бірге елдің амандығы үшін дұға жасады.